Waalä
Är weiss wie’s isch
Und wie’s muess sii.
Suiberä Tisch
und klarä Wii.
I Sänku stellä.
D’Chnepf iituä.
Me muess nur wellä!
Ornig und Ruä!
Jedä wo das nid so gseed,
Isch bi ihm am falschä Ort.
Das seid är iis i jeder Reed.
Si Grundsatz isch: ä Maa - äs Wort.
Är hed Fragä
Weiss nid gnai,
was richtig wär,
fragd sini Frai.
Uberleggä,
Zwiifel ha,
um mängä Eggä
umegaa,
Bevor är sich äs Urteil macht.
Är hed‘s nid so mid de Gschnellä
mistruit de Starchä und dr Macht.
Wott sich i Dienscht vo allnä stellä.
Und ich sett jetz fir mich entscheidä,
welem das ich d‘ Stimm wott gää
Wool isch es mer bi keim vo beidä.
Mä sett ä drittä chennä nää.
Sorgfältig, aber klar im Dänkä,
Kritisch und ideäriich.
Dem chennt ich s’Vertruiä schänkä.
Eim, wo äänlich isch we n’ich.
Tony Ettlin