Die da und die däne
Die da, sind nu nid däne.
Die däne, sind nimme da.
Die da wettid nu lang nid däne sii.
Die däne, wettid nimme zrugg - dänkid die da.
Die däne, sind mängisch gliich da,
ai wenn die da, die däne nid chenid gseh.
Die da, redit mängisch mit dene däne.
Die däne, redid villicht ai mid dene da,
nur gheerid die da, die däne meischtens nid.
Es muess fir die däne fruschtrierend sii,
dass die da, nid losid.
Wenn die da de einisch däne sind,
merkid's was sie hättid chennä gheerä,
wo's nu da gsi sind,
aber äbe: die däne, chenid nimme zrugg.
Die däne, hend's guet
dänkid die da.
Die da, chenntid's guet ha,
wenn sie ä chli meh dra dänke wurdid,
wie's de isch, wenn sie däne sind.
Sie wurdit chli meh da sie, solang sie nu nid däne sind.
So stellid sich die da, das vor.
Wie 's de isch, wenn sie däne sind,
wissid die da erscht, wenn sie däne sind.
Tony Ettlin, Sept. 2007